Kapal Pesiar ; Piteket-piteket

gerbang-gumang

Akéh pisan anom-anom Baliné meled makarya ring kapal pesiar. Indik puniki kasinahan ring agén parékrutan tenaga kerja kapal pesiar. Agén punika setata akéh karauhin olih krama sané meled uning, napiké wénten galah makarya ring genah inucap. Anom-anomé punika lascarya bulak-balik Bugbug – Denpasar, wantah mangdané uning yaning bénjangan wénten lowongan. Bulak-balik saking genahné sané doh ka Dénpasar kalaksanayang nénten ja apisan utawi ping kalih, sakéwanten sering. Kawéntenan punika nyihnayang agengnya pangaptian anom-anom Baliné makarya ring widang punika.  Paraiindikane punika kawedarang olih I Ketut Pariasa sekadi kasurat ring Bali Post/BP/191008.

Gatra ring koran nguningang duk tés parékrutan, pamiletnyané akéh pisan. Wantah akidik sané prasida lulus turin prasida molihang galah “ngeduk dolar” ring hotél kambang sané mawasta kapal pesiar punika. Panjang pisan pailehan anaké makarya ring kapal pesiar, mawinan ketah kanikang suénnyané paileh punika ngantos numbuhang jenggot.

Ring sajeroning parékrutan, ri sampunné sang sané ngrereh karya kasinahang lulus makasami tés, wénten tés pinih untat marupa tés kaséhatan. Tés puniki kaanggé mastikayang sang makarya yakti-yakti séhat lan nénten makta panyungkan sané pacang nularin anak siosan. Dadosné majeng pekerja sadurungé becikan uning indik kawéntenan kasehatannyané mangdané yéning wénten panyungkan prasida kakelidin miwah kaubadin.

Makarya ring kapal patut sayaga ring méntal lan fisik. Kapertama, sané pinih abot ngeninin nyayagayang méntal. Méntal sané sayaga artosné, sang makarya yakti-yakti sadia makarya, ngrereh jinah, lan kayun kapréntah olih pimpinannyané, masiosan ring kawéntenan ring darat. Sakéwanten yéning i raga sampun pastika uning ring hak, kawajiban, lan genah i ragané, pimpinan nénten pacang ngawag-ngawag mréntah i raga. Minab pateh kadi dija-dija, sané wikan nyenengin lan ngajum pimpinan ketah polih aget lan kasayangin.

Makarya ring kapal merluang bayu ageng, sakéwanten kasuén-suén pacang biasa, lan yéning kamargiang, rahina-rahinané pacang mamargi. Dadosné, kasabaran sané pinih abot. Duaning galah makarya sayuwakti jimbaran ring makarya ring darat nganutin hukum laut internasional.

Makarya ring dija-dija pateh, ngawi kenyel. Nénten wénten pakaryan sané dangan. Sané wénten wantah pakaryan sané anut lan nénten anut. Sané pinih nyenengin wantah ri kala nrima upah.

Galah-galah pangawit makarya ring kapal wantah galah sané nénten ajeg. Galah-galah punika ketah wénten rasa kangen meled budal utawi nyerah. Minab sangkaning durung biasa doh saking kulawarga, nénten kuat, utawi nénten yakti-yakti meled makarya. Ring galah-galah kadi puniki, i raga patut ngajegang raga. Becikan yéning mamanah kadi puniki, “Pinih becik leleh sangkaning makarya bandingan ring leleh sangkaning nganggur.” Leleh makarya ngwetuang jinah, leleh nganggur wantah pacang ngaé lek lan nénten polih jinah.

kapal-pesiar-di-labuhan-amu

Tenaga Asia ketah ngawitin saking genah pinih beten. Makarya ring kapal pesiar Amerika, upahné kedikan ring makarya ring darat. Sakéwanten untungné, makarya ring kapal pesiar polih ajengan lan genah sirep. Dadosné i raga prasida nyimpen jinah, napi malih genah makarya masengker, nénten wénten genah matumbasan.

Makarya ring kapal i raga patut makarya sané wenang lan patut, sané anut ring prosedur. Contoné yéning ngangkat barang baat nénten mrasidayang praragan patut nunas tulung. Sampunang maksaang raga mangda nénten keni sengkala.

Makarya ring kapal becik yéning kaanggén titi pangancan majeng anom-anom Baliné ngujur masa depan sané becikan. Duaning napi sané polihang ring kapal pesiar, pacang akéh ajinné yéning bakta ka Bali. Yaning jinah sané kapolihin, pacang prasida kadadosang makarya warung nasi, warung internét, kos-kosan, genah kursus, lan utsaha siosan. Lamakane yang wantah kaangkat pitekete puniki, mangdane becik-becik makta raga pamekas saking geginan sane boya-boya, minakadi mabuk-mabukan, berfoya-foya lan margi tan becik sane siosan.

Pamuputné, i raga patut mawali budal ka kulawarga lan nyama braya. Punika mawinan makarya ring kapal pesiar patut becik karencanayang suénnyané pacang makarya i rika.

Akéh sané prasida kacritayang ngeninin makarya ring kapal pesiar, wénten becik lan kaon, adil, lan sangsihnyané. Sané pinih abot, makarya ring kapal pesiar maaji pisan duaning prasida napak ring genah soléh, uning ring kawéntenan adat sané masiosan.

Keposting olih I Wayan Ardika, SE.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: